Цэнтр міжкультурнага дыялогу і Пасольства Украіны ў Рэспубліцы Беларусь арганізавалі 19 студзеня 2011 г. прэзентацыю калектыўнай кнігі “Захаванне нацыянальнай самабытнасці ў кантэксце развіцця міжкультурнага дыялогу” з удзелам кіраўніка Прадстаўніцтва ААН у Рэспубліцы Беларусь А.Брука, кіраўніка Прадстаўніцтва ЕС у Рэспубліцы Беларусь Ж.-Э.Гольцапфеля, кіраўнікоў і прадстаўнікоў 17 дыпламатычных місій еўрапейскіх краін, органаў дзяржаўнага кіравання, прадстаўнікоў бізнесу, хрысціянскіх канфесій, вядомых навукоўцаў і дзеячоў культуры, грамадскіх дзеячоў, прадстаўнікоў мас-медыя.
Кніга “Захаванне нацыянальнай самабытнасці ў кантэксце развіцця міжкультурнага дыялогу” была падрыхтавана і выдадзена Цэнтрам міжкультурнага дыялогу як вынік шырокага міжнароднага абмеркавання актуальнай праблемы захавання беларускай культурнай самабытнасці ў сучасным глабальным свеце, узнятай у адной з прац генеральнага дырэктара Цэнтра міжкультурнага дыялогу Любові Уладыкоўскай. Сярод аўтараў калектыўнай кнігі — дыпламаты, навукоўцы, рэлігійныя дзеячы, творчая інтэлігенцыя, прадпрымальнікі.
Прысутныя стоячы дзякавалі замежным аўтарам кнігі – кіраўніку Прадстаўніцтва ААН у Рэспубліцы Беларусь Антоніусу Бруку, Часоваму Паверанаму ў справах ЗША ў Рэспубліцы Беларусь Майклу Скэнлану, Часоваму Паверанаму ў справах Рэспублікі Польшча ў Рэспубліцы Беларусь Вітальду Юрашу, Надзвычайнаму і Паўнамоцнаму Паслу Дзяржавы Ізраіль у Рэспубліцы Беларусь Эдуарду Шапіра, Надзвычайнаму і Паўнамоцнаму Паслу Славацкай Рэспублікі ў Рэспубліцы Беларусь Мар’яну Серватка, саветніку па культуры Пасольства Украіны ў Рэспубліцы Беларусь Васілю Бондару і іншым вядомым асобам.
Бездакорная прафесійная кампетэнтнасць і асабістая падтрымка Надзвычайнага і Паўнамоцнага Пасла Украіны ў Рэспубліцы Беларусь Рамана Пятровіча Бяссмертнага, арганізаваная сумесная праца ўсяго Пасольства і Цэнтра дазволілі правесці па сутнасці дыпламатычны прыём у адпаведнасці з самымі высокімі міжнароднымі стандартамі. Сустрэча выклікала вялікі станоўчы рэзананс і атрымала высокую ацэнку з боку як беларускай, так і міжнароднай грамадскасці.
Падчас прэзентацыі былі абмеркаваны шляхі ўмацавання культурнай самабытнасці як асновы канструктыўнага міжкультурнага дыялогу, вызначаны формы далейшай распрацоўкі пытання ў міжнародным фармаце, што будзе садзейнічаць аб’яднанню намаганняў інтэлектуальнай, творчай, духоўнай і бізнес-эліты ў распаўсюджванні ведаў пра беларускую культуру, кансалідацыі сучаснага беларускага грамадства.
Як адначыў Раман Бяссмертны, які, дарэчы, выступаў па-ўкраінску, беларуска-ўкраінскі міжкультурны дыялог мае глыбокую гістарычную аснову і грунтуецца не толькі на блізкасці нашых менталітэтаў і светапоглядаў, наяўнасці супольнага палескага рэгіёну, але і на неабходнасці ўлічваць досвед адзін аднаго ў захаванні народнай, традыцыйнай часткі нашых нацыянальных культур.
Старшыня Вышэйшага каардынацыйнага савета Рэспубліканскай канфедэрацыі прадпрымальніцтва Уладзімір Карагін звярнуў увагу прысутных на тое, што бізнес і культура як осноўныя фактары будаўніцтва грамадзянскай супольнасці сёння патрабуюць асаблівай падтрымкі для свайго развіцця.
Ініцыятар і вядучая мерапрыемства Любоў Уладыкоўская адзначыла, што міжкультурны дыялог магчымы пры наяўнасці суб’ектаў дыялогу – саміх нацыянальных культур, якія, у сваю чаргу, патрабуюць салідарнасці, што ляжыць у аснове свабоды для асобы і дэмакратыі – для грамадства. З іншага боку, міжкультурны дыялог варта разумець як дыялог розных груп людзей з уласцівымі ім поглядамі і перакананнямі, а таксама само права на існаванне адрознага, інакшага. Міжкультурны дыялог – гэта такі адкрыты і пачцівы абмен думкамі, які вядзе да глыбейшага разумення і ўспрымання іншых, а значыць, да мірнага, бесканфліктнага вырашэння самых розных пытанняў і праблем, служыць асновай дэмакратычнай манеры міжнароднага камунікавання. Міжкультурны дыялог прадугледжвае існаванне роўных магчымасцей, у тым ліку роўную годнасць, добраахвотныя абавязкі, адкрытае мысленне, гатоўнасць улічваць агульнае і адрознае, хаця б мінімальныя веды адзін пра аднаго, здольнасць знайсці агульную мову для разумення адрозненняў і павагі да іх.
Дыялог паміж культурамі як фундаментальная мадэль дэмакратычнай камунікацыі, якая супрацьстаіць насіллю і вучыць жыць мірна і канструктыўна ў полікультурным свеце, служыць інструментам дасягнення кансенсусу і недапушчэння канфліктаў дзякуючы павазе да чалавечай асобы і любым праявам яе творчай ініцыятывы. Міжкультурны дыялог садзейнічае грамадскай салідарнасці, талеранцыі, ён не дапускае распаўсюджвання фанатызму, ізаляванасці, здатных прывесці да здзічэння цэлых народаў.
Удзельнікі мерапрыемства асабліва адзначылі цёплую, душэўную атмасферу, якая панавала падчас сустрэчы, што стала магчымым перш за ўсё дзякуючы выставе майстроў беларускай народнай творчасці (ткацтва прадстаўляла Наталля Канановіч, саломапляценне – Алена Папкоўская, разьбу па дрэве – Дзмітрый Зайцаў, глінабітнае майстэрства – Сяргей нарановіч), а таксама дзякуючы выдатна падабранаму рэпертуару ансамбля флейтыстаў “Brevis» пад кіраўніцтвам Паўла Сурагіна.
Міжкультурны дыялог адбыўся. І будзе мець працяг.
